COMMUNICADO

Anuncio

TA RE-INTRODUCI E CARTA DI RE-ENTRY

DIMAS ta cumpli cu su deber di informa publico en general cu Minister di Integracion a tuma e desicion pa  re-introduci e asina jama "Carta di re-entrada" of "Re-entry letter" entrante di 9 di december 2009. 

Kico ta un carta di re - entrada?

E carta di re-entrada ta un declaracion di DIMAS den 4 idioma (Hulandes, Papiamento, Spano y Ingles) cu ta indica cu e persona en cuestion cu ta rekeri di permiso pa ta na Aruba tin autorisacion di e autoridadnan conserni pa por sali y drenta Aruba. E documento aki ta relevante pa e cliente cu tin intencion di viaha den e periodo venidero y ta ser usa pa mustra na e autoridadnan na frontera (cu eventualmente no por lesa Hulandes).

Kennan ta bin na remarca pa haya un carta di re-entrada?  

Esnan cu ta inscribi na Aruba y tin sea un permiso di estadia temporal of indefini cu ta valido of esnan tin un peticion pa un siguiente permiso di estadia temporal of indefini den proceso. Pa cu e ultimo categoria tin sierto restriccionnan aplicabel. Tambe esnan cu tin un asina yama voorlopige voorziening di corte cu ta dunanan derecho pa keda den espera di un contesta riba nan apelacion aki na Aruba, ta bin na remarca pa por aplica pa dicho declaracion.

Con e procedura ta pa aplica pa un carta di re - entrada?

E procedura pa hanja esaki lo ta igual cu den pasado.

E cliente ta acudi primeramente na departamento di SIAD cu e formulario di aplicacion cu tin tambe e lista di rekisitonan riba dje y ta paga e suma di Afl. 40,-- na leges. Cu e comprobante di pago aki mas tambe demas documentonan pidi e por acudi na DIMAS - sin sita previo - di dialuna pa diabierna durante di orario di oficina: 8:00 - 11:30 of 13:00 - 14:00 pa haci entrega di su peticion pa un carta di re-entrada.

Dentro di cuanto tempo por spera un contesta riba un aplicacion pa un carta di re - entrada?

E persona cu aplica pa un carta di re entrada por pasa DIMAS despues di 2 dia (48 ora) entre 3or y 4or di atardi pa ricibi su contesta riba su aplicacion.

Unda por haya e formulario di aplicacion pa un carta di re - entrada?

E formulario pa peticion por wordo gedownload for di nos website: dimasaruba.com of tambe por acudi na nos oficinanan na Wilhelminastraat pa hanja e formulario (checklist) cu requisitonan.

Comprobante di entrega na tempo (Bewijs van Tijdige Indiening) ta alabes bo carta di re - entrada

DIMAS ta reitera e importancia y responsabilidad di cada cliente pa haci entrega di peticion pa un permiso di estadia temporal of pa tempo indefini na tempo (promer cu e permiso anterior caduca). Un cita por wordo hasi 3 luna promer cu e fecha di vencimento di e peticion anterior pa medio di nos website dimasaruba.com of via nos HELPDESK. Ora di entrega na tempo (promer cu e fecha di vencimento) DIMAS ta duna e cliente un prueba di entrega na tempo, asina yama un "Bewijs van Tijdige Indiening" gratuitamente y e ultimo aki ta alabes un carta di re – entrada y tin validez di 4 luna.